*** Index du Forum ***

Feti ya le 27 avril 1989 esalamaka na Nkamba, Yeluselemi ya sika, liboso ya ba Mvuala misato (Papa KISOLOKELE LUKELO, Papa DIALUNGANA KIANGANI pe Papa DIANGIENDA KUNTIMA). Na mokolo muango, maman Nkaku Balomba, mokonzi ya liboso ya AFKI, apesaka maloba mokuse epayi ya ba mama « kimbanguistes » ya mokili mobimba. Yango etangamaka bongo na « pauvre » mama Sita Marie, na lotomo ya ye meyi mama Nkaku Balomba.

« … Tango Tata Simon KIMBANGU akangamaka, Mama MUILU atikalaka ye na bana, pe na sima bakangamaka ye na bana. Batiaka bango na boloko oyo basalaka sanza motoba na kati : kolia te, kobima te. Ba soda libanda bazali kokengela, pe kuna nde bapesaka bango « cryolite » pona bakufa. Kasi Tata Simon KIMBANGU tango nioso azalaki koya kotala bango, pe ba angelous bazalaki komemela bango bilia. Atikeli biso ndakisa ya komikitisa lokola muana, nzoka nde azali mama ya mokili mobimba, atako mokili moyebi ye te. Mokolo mua lelo ndenge eyangani biso banso na esika oyo ezali esengo monene, mpo tolimbola mibu tuku misato mia boweyi bua mama na biso Mama MUILU Kiawanga. Nkolo YESU, tango akokisaki mibu tuku misato, abandaki mosala na ye. Papa Simon KIMBANGU, kobanda 1921 ti na 1951 akokisaki mibu tuku misato, ye abimaki na boloko ; alobaki nakozonga lisusu kuna te…Bana na bango misato moko moko kombo na ye ezali na ba lettres misato. Na bango misato esali lettres tuku misato, wana elakisi ete bango bazali bato na biso ya mokili te, kasi ya likolo.

Liboso ya kokufa na ye, Mama MUILU amemaka ba Papa na Ndimba Nkenge, pe alakisaki bango sanduku oyo etondaki na esemolo nioso ya Papa Simon KIMBANGU. Elakisi ete mabombami nioso ya molimo na ya bonzoto ya lingomba na biso ezalaka na ye. Na motungisi ya ba mindele ayikaki mpiko. Tango Mama MUILU amonaki ete tango na ye ekoki, na mokolo mua le 12 avril 1959, amonisaki mosala na ye nioso; apesi ba cartes na bateyi pona bazala ba tambolisi na kati na lingomba. Apesaki yango na basi na mibali. Apesi esika ya muasi pona bible elobi ete muasi akoki kosala eloko te. Nzoka nde Mama MUILU azali moko ya yambo oyo apesi lokumu na muasi. Tozali komona ba mama pasteurs, ba mama selo, ba mama longi. Na mosala oyo ya bonzoto tozali komona ba mama ministres, docteurs, pharmaciennes, magistrats pe misala mosusu ya ndenge na ndenge ; oyo tango ya kala muana muasi surtout ya moyindo akokaka kosala te. Na yango totombola ba Papa na ndenge ya bolingo monene, makasi, kitoko pe molende epayi bakamati mokumba monene. Batomboli muasi na mokolo mua lelo, pona ete Papa Simon KIMBANGU pe asalaka na ba mama na biso, oyo balandi makolo na ye pe ya Mama. Ndakisa mama Mikala, mama Therèse Mbonga na mama Clémentine. Totondi bino.

Na mokolo mua le 8 octobre 1965, nde Papa Mfumu’a nlongo mokonzi ya bule, asangisaka ba mama nioso pe apesaka bango mokumba ya bomemi misala ya Mama MUILU ; oyo ebengami « association des femmes kimbanguistes MUILU Marie ». Aponi mama Nkaku Balomba pona azala liboso ya lisanga yango. Tina ya kosala association ezali pona kotombola ba mama na makambo nioso ya molimo, ya boyekoli pe ya boyebi ndenge yakozala na baninga na bolingo. Kolakisa ba mama boyebi mikanda, kolakisa bilenge kotanga, coupe, couture, enseignement ménager, éducation chrétienne. Kosalisa ba bola, kokende na hôpital, na boloko pe koluka baye balembi na kondima. Bakambaka pe bana kokende na bango na colonie de vacances, pe retraite spirituelle, beko mokolo inso ya poso. Boyekoli ya mokanda na Nzambe, kosala pe ba programme ya bilanga, pe kobokola bibuele na mbisi. Kosalaka ba séminaires ya formation ya cadres pe kosalaka ba conférences. Kotindaka ba mama pona botongi ba ndako, pe kozalaka na mayangani mbala misato na poso… Tobatela bolingo, mibeko pe misala. Na kombo ya Tata, Muana pe Molimo Mosantu.

Kimbanguistes oyé !!
Ba mama oyé !
Mama MUILU oyé